14 яше тулган балалар дәүләт хезмәтләре порталында үзләре теркәлә ала
(Казан, 7 февраль, «Татар-информ»). 14 яшьтән соң балаларга дәүләт хезмәтләре порталында мөстәкыйль теркәлергә мөмкин булачак. Хөкүмәт балаларга 14 яшьтән башлап дәүләт хезмәтләре порталында мөстәкыйль рәвештә теркәлергә мөмкинлек бирә торган карар әзерләгән. Бу хакта Министрлар Кабинетының телеграмм-каналында хәбәр ителә. «Закондагы әлеге мөһим үзгәреш балаларны һәм аларның ата-аналарын инстанцияләргә йөрүдән һәм документлар җыюдан коткарачак», — дип белдерде Премьер-министр Михаил Мишустин үз урынбасарлары белән киңәшмәдә. Шулай итеп, шәхси кабинет аша яшүсмерләр электрон көндәлеккә керә, бәяләрне карый, өй эшен белә, шулай ук уку йортына керү турында мәгълүмат ала һәм каникул вакытында эшләү өчен гариза яза ала.