Рөстәм Миңнеханов Россиядә чүп чыгаруга яңа норматив тәкъдим итте
(Казан, 17 февраль, «Татар-информ», Алексей Угаров). Операторлар судта нормативларга карата шикаять белдерү чорында үз хезмәтләре өчен түләү ала алсын өчен, Россиядә көнкүреш калдыкларын чыгаруга вакытлыча тариф кертергә кирәк. Бүген бу хакта Татарстан Республикасы Президенты Рөстәм Миңнеханов Россиянең Төзелеш һәм торак-коммуналь хуҗалык министрлыгы коллегиясе һәм Россия Дәүләт Советының «Төзелеш, торак-коммуналь хуҗалык, шәһәр мохите» юнәлеше буенча комиссиясенең уртак утырышында хәбәр итте.
«Каты коммуналь калдыклар белән эш итү буенча яңа системаның 3 ел эшләү дәверендә бу өлкәдә законнарга төзәтмәләр кертү зарурлыгы туды. Регионнар каты көнкүреш калдыкларын туплауның региональ нормативларын юкка чыгару буенча суд карарлары белән очраша. Мондый карарларда төбәк нормативларны яңадан карарга мәҗбүр, бу бер календарь елын били.
Калдыклар барлыкка китерүче предприятиеләрнең бер өлеше бу чорда әлеге хезмәт өчен түләмәү мөмкинлегенә ия. Судлар тарафыннан кире кагылган нормативларны яңадан карау вакытында төбәкләр куллана алырлык вакытлы нормативларны федераль дәрәҗәдә расларга кирәк», — дип тәкъдим итте ул.
Татарстан Президенты Рөстәм Миңнеханов дәүләт башлыгы Владимир Путин йөкләмәсе белән «Төзелеш, торак-коммуналь хуҗалык, шәһәр мохите» юнәлеше буенча Россия Дәүләт Советы комиссиясен җитәкли.