Си Цзиньпин Россия һәм Украина арасында сөйләшүләр алып барырга чакырды
(Казан, 25 февраль, «Татар-информ»). Кытай Халык Республикасы (КНР) рәисе Си Цзиньпин Россия һәм Украина арасындагы сөйләшүләр юлы белән Донбасстагы конфликтны тыныч җайга салу өчен чыгыш ясады. Бу хакта ул Россия Президенты Владимир Путин белән телефоннан сөйләшү вакытында белдерде.
«КНР рәисе Си Цзиньпин 25 февральдә көннең икенче яртысында РФ Президенты Владимир Путин белән телефоннан сөйләште», — дип хәбәр итә Кытайның Үзәк телевидениесенә сылтама белән ТАСС.
Россия лидеры белән сөйләшүдә Кытай Халык Республикасы рәисе Европа иминлегенең нәтиҗәле һәм тотрыклы механизмын формалаштырырга чакырды, дип билгеләп үтелә.
Искәртик, 21 февральдә Россия Президенты Владимир Путин халык республикаларының бәйсезлеген таныды, ә 24 февральдә, аларның башлыкларының мөрәҗәгатен алгач, Донбасста махсус хәрби операция турында игълан итте.
Икенче көнне Украина ягыннан сөйләшүләргә әзерлек турында гариза килде.
Дәүләт башлыгының матбугат сәркатибе Дмитрий Песков сүзләренчә, Киев ягыннан бу инициативага анализ ясарга кирәк, әмма бу «уңай якка хәрәкәт» турында сөйли.