Свердловск өлкәсендә «Гомерем минем моңлы бер җыр иде» дигән бәйге уза
(Казан, 28 февраль, «Татар-информ»). Свердловск өлкәсенең Түбән Сырга районы «Әрәкәй авылы милли-мәдәни комплексы» муниципаль мәдәният учреждениесе тарафыннан ел саен үткәрелә торган «Гомерем минем моңлы бер җыр иде» дип аталган төбәкара сәнгатьле укучылар бәйгесендә катнашу өчен гаризалар кабул итү төгәлләнде.
Татарстан Республикасының Свердловск өлкәсендәге Даими вәкиллеге матбугат хезмәте хәбәр иткәнчә, әлеге конкурс Свердловск өлкәсе Мәдәният министрлыгы һәм Казан шәһәренең Бөтендөнья татар конгрессы Башкарма комитеты ярдәмендә Екатеринбург шәһәре өлкә китапханәсе белән берлектә уздырыла.
Бәйгегә Свердловск, Курган, Киров, Төмән, Омск, Түбән Новгород өлкәләре, Пермь крае, Марий Эл һәм Татарстан республикаларыннан (алар илледән артык территория һәм муниципалитетны тәкъдим итә) 370 гариза кабул ителгән.
Оештыручылар хәбәр иткәнчә, конкурска карата кызыксыну елдан-ел арта бара, бәйгедә катнашучылар герой-шагыйрьнең әсәрләрен рус, татар, белорус һәм инглиз телләрендә укыячак.
Составында Свердловск өлкәсе һәм Татарстан Республикасының танылган мәдәният һәм сәнгать эшлеклеләре, педагоглар һәм журналистлар булган жюри җиңүчеләрне 2022 елның 12 мартында игълан итәчәк.