Биектау районында яшь гаиләгә социаль түләүләр алуга сертификат тапшырылды
(Биектау, 5 март, «Татар-информ», « Биектау хәбәрләре »). Биектау районында яшәүче Логиновлар гаиләсенә фатир сатып алуга яки йорт салуга сарыф итәргә мөмкин булган социаль түләүләр алуга сертификат тапшырылды. Яшьләргә субсидияне Биектау районы Башкарма комитеты җитәкчесе Равил Хисаметдинов тапшырды.
«Бу сертификат күңел түрендә йөрткән хыялыбызны тормышка ашырырга тотылачак — безнең үз йортыбызны саласыбыз килә. Гаиләдәге һәр кешенең үз бүлмәсе, шулай ук яшелчәләр, җиләк-җимеш агачлары утыртырлык бакчабыз, мунчабыз булсын дип хыялланабыз. Без, әлбәттә, Биектау районында яшәячәкбез» — диде Оксана.
Логиновлар Татарстанга моннан дүрт ел элек күченеп килгән. Сергей тумышы белән Ленинград өлкәсеннән, ә Оксана — Марий Эл Республикасыннан. Матди ярдәм алу мөмкинлеге турында телевизордан караган тапшырудан белгәннәр.
Иң кыены кирәкле документларны туплау булган. Моңа өч еллап вакыт киткән. Гариза биргәндә ярдәмгә мохтаҗ булуыңны раслау бик мөһим. Логиновлар гариза белән Биектау районы Башкарма комитетының яшьләр эшләре һәм спорт бүлегенә мөрәҗәгать иткән. Аннары, субсидиягә сертификат алу өчен, кирәкле документларны җыйганнар. Менә хәзер тиздән алар хыялларында йөрткән йортны сала башлаячак.
«Яшь гаиләләрне торак белән тәэмин итү» программасы торак бәясенең 35 проценты күләмендә кире кайтарып бирергә кирәк булмаган финанс ярдәме алырга булыша. Бу Россия Төзелеш һәм торак-коммуналь хуҗалык министрлыгының 2006 елдан бирле тормышка ашырыла торган федераль программасы. Ул бөтен ил күләмендә, шулай ук Татарстанда да гамәлгә ашырыла. Россиядә субсидияне 8 мең кеше алган инде.