Европа Советы Россиянең оешма әгъзасы булудан туктавын игълан итте
(Казан, 16 март, «Татар-информ»). Россия Европа Советына керүдән туктады.
«Чираттан тыш утырышта бүген иртән Европа Советы Уставының 8 маддәсе нигезендә башланган процедура кысаларында Министрлар комитеты Россия Федерациясе бүгенге көннән алып Европа Советы әгъзасы булудан туктый, дип карар чыгарды», диелә оешманың Министрлар комитеты коммюникесында. Бу хакта РИА Новости хәбәр итә.
Россия Европа Советы составында 26 ел булды. Элегрәк Мәскәү Европа Советы составыннан һәм Кеше хокуклары буенча Европа конвенциясеннән китәчәген белдерде. Шуңа да карамастан, ил аның мәнфәгатьләренә җавап бирә торган конвенцияләрдә калырга әзер, дип саный Федерация Советы вице-спикеры Константин Косачев.