Татарстанда тагын 525 кеше коронавирус инфекциясе йоктырган
(Казан, 17 март, «Татар-информ»). Татарстанда коронавирус инфекциясен йоктыручылар кимүен дәвам итә. Соңгы тәүлектә 525 яңа очрак (бер көн элек 550 иде) теркәлгән, 94 кеше хастаханәгә озатылган. Бу хакта ТР Сәламәтлек саклау министрлыгының матбугат хезмәте хәбәр итә.
«Инфекция йоктыручылар арасында 18 яшькә кадәрге балалар — 122 кеше», — диелә хәбәрдә.
Казанда — 151, Чаллыда — 71, Яшел Үзән районында — 32, Әлмәт районында — 26, Түбән Кама районында — 23, Бөгелмә районында 21 очрак ачыкланган.
Пандемия башланганнан алып республикада коронавирус инфекциясенең 132 799 очрагы теркәлгән, 115 393 кеше (шуларның 1 733е — узган тәүлектә) терелгән. Барлыгы 1 800 кеше коронавирус корбаны булган.