Татарстанның дүрт вәкиле Forbes журналы төзегән Россия миллиардерлары исемлегенә кергән
Forbes журналының Россиядәге редакциясе илнең иң бай 88 миллиардерын үз эченә алган исемлек бастырып чыгарды. Анда Татарстаннан да дүрт вәкил кергән.
73нче баскычта «ТАИФ-НК» предприятиесенең директорлар советы әгъзасы Рөстәм Сүлтиев урнашкан. Редакция аның байлыгын 1,3 миллиард доллар белән бәяләгән.
Forbes язуынча, «Сибур»ның директорлар советы әгъзасы Альберт Шиһабетдиновның байлыгы да шуның кадәр. Ул рейтингның 74нче баскычын били. ТАИФның элеккеге генераль директоры «Сибур» җитәкчелеге составына компанияләрне берләштергәннән соң керде.
Исемлектә Айрат һәм Радик Шәймиевләр дә бар. Алар исемлектә 80 һәм 81нче баскычны били. ТАИФның элеккеге акционерлары хәзер «Татавтодор» һәм «НИРА-экспорт» генераль директорлары буларак күрсәтелгән. Һәркайсының байлыгы 1,2 миллиард доллар белән бәяләнә.
Яңа Липецк металлургия комбинатының директорлар советы рәисе Владимир Лисин (18,4 миллиард доллар), «Норникель» президенты Владимир Потанин (17,3 миллиард доллар) һәм Павел Дуров (15,1 миллиард доллар) рейтингның башында тора.