«Тукай марафоны-2022» йөгерү ярышында җиңүчеләр бүләкләнде
Бүген Арчада «Тукай марафоны-2022» йөгерү ярышлары узды. Йөгерү марафоны Арча Мәдәният йорты каршыннан башланып китте. Мәктәп яшендәге балалар һәм яшүсмерләр 11 км, олы яшьтәгеләр 24 км араны йөгерделәр.
Финиш Яңа Кырлайда Габдулла Тукай музей-комплексы каршында булды. Йөгерешчеләрне тантанага кайткан язучылар каршы алдылар.
15-17 яшьлек кызлар һәм егетләр Әзәк авылыннан Яңа Кырлайга кадәр 11 км араны йөгерделәр. Иң беренчеләрдән булып Ашытбаштан Рүзәл Әүхәдиев, Байлар Сабасыннан Сабина Хабирова килде.
Фото: © Булат Рәхмәтуллин
Олы яшьтәгеләр 24 км араны узды, алар Арчадан Яңа Кырлайга кадәр йөгерделәр. 18-29 яшьлекләр арасында беренче урынны Казаннан Илья Вархушев, Байлар Сабасыннан Сирена Кәбирова яулады.
30-39 яшьлекләр арасыннан беренче урынга Казаннан Сергей Семенов, Балтачтан Альбина Шәрипова лаек булды. 40-49 яшьлекләр арасында иң беренче булып Марий-Элдан Руслан Панин һәм Гүзәл Абдуллина килде. 50 яшьлек һәм өлкәнрәк хатын-кызлар һәм ир-атлар арасында беренче урынга Балтачтан Михаил Павлов белән Фәридә Нәкыйпова лаек булдылар.
Җиңүчеләрне Арча районы Яшьләр эшләре һәм спорт бүлеге җитәкчесе Айрат Хәбиров бүләкләде.