Әфганстан табиблары Татарстан медицина белгечләреннән ярдәм сорады
Кабулда Әфганстан Ислам Әмирлегендә Россия мөселманнарының хәйрия патриотик фонды вәкиллеге директоры Мөхәммәт Йосыф Шинвари Әфган үзәк хастаханәләренең берсе – «Омид» үзәге җитәкчелеге белән очрашты.
«Без хастаханә эшчәнлеге белән таныштык. Биредә ашыгыч ярдәмнән башлап бөтен спектр медицина ярдәме күрсәтелә. Биредә барлык органнарга да диярлек операцияләр үткәрелә. Шулай ук онкоүзәк, җиһазлар, өч йөздән артык табибтан торган иң заманча персонал бар. Хәзер хастаханә квалификацияле һәм тәҗрибәле белгечләр җитмәү проблемасы белән очрашкан. Һәм алар көчле фәнни-мәгариф потенциалы булган Россия медицинасына өмет баглый», – дип сөйләде Мөхәммәд Йосыф Шинвари «Татар-информ» журналистына.
«Омид» хастаханәсе 2016 елның февралендә ачылды. Ул Кабулда әйдәүче медицина үзәге булып тора.
Башта аның белән Американың Mayo Clinic академия медицина үзәге кураторлык иткән. Соңрак Америка контингенты Әфганстаннан чыгарылгач, хастаханәдән америка медицина персоналы да киткән. Шул рәвешле хастаханә җитәкчелеге белгечләр җитмәү проблемасы белән очрашкан.
Аннары Америка табиблары Кабулдагы коллегалары белән видеоконсультацияләр режимында эшләргә тырыша. Тик Кабулдагы электр һәм интернет белән даими өзеклекләр булу сәбәпле, мондый аралашу форматы бетә бара.
«Без берничә Россия клиникасына, шул исәптән Татарстан клиникасына мөрәҗәгать итәргә телибез. Алардан консультатив ярдәм һәм Кабулдагы хезмәттәшләрен укыту өчен белгечләр җибәрүләрен сорыйбыз», – дип билгеләп үтте Россия мөселманнарының Казан хәйрия фонды генераль директоры Рөстәм Хәбибуллин.
Әфганстанның сәламәтлек саклау системасында хәл яңа хөкүмәт килгәч начарлана башлады. Бу өлкәдә иң зурлардан саналган «Сехатманди» проектын финанслау туктатылды. Нәтиҗәдә, Әфган складларында дару препаратлары кими һәм аларның запасларын тулыландыру эше алып барылмый.