Ульяновск өлкәсендә «Авылым мәчетенең тарихы» конкурсының нәтиҗәләре билгеле
Ульяновск өлкәсенең «Өмет» газетасын «Авылым мәчетенең тарихы» конкурсының нәтиҗәләре турында хәбәр итте.
Өлкә ифтарында «Авылым мәчетенең тарихы» дип аталган конкурсның нәтиҗәләре билгеле булды.
Идел Болгарстанында Ислам динен ирекле рәвештә кабул итүгә 1100 ел булуы уңаеннан Ульяновск өлкәсе мөселманнарының региональ диния нәзарәте, «Сембер» бизнес-клубы һәм «Өмет» газетасы редакциясе тарафыннан «Авылым мәчетенең тарихы» дигән темага мәкаләләр конкурсы игълан ителгән иде.
Конкурска өлкәбезнең төрле районнарыннан кыска гына вакыт эчендә ике дистәгә якын хат килде. Аларның авторлары туган авыллары мәчетләренең шанлы тарихы һәм бүгенге тормышы турында гыйбрәтле, мавыктыргыч итеп язалар. Конкурс комиссиясе алар арасыннан аеруча бай эчтәлекле язмаларны сайлап алды һәм җиңүче итеп таныды. Менә алар – өлкә конкурсында җиңүчеләр: Николаевка районы Зур Чирекле авылыннан хезмәт ветераны Халимә Адельша кызы Рамазанова, Яңа Малыклы районы Өчкаен авылы китапханәчесе Әнисә Абдулла кызы Нетфуллина, Иске Кулаткы районы Мосеевка – Муса авылыннан мәдәният хезмәткәре Руфия Кәбир кызы Ахтямова һәм Карсун районы Сакускай – Уразовка авылыннан актив җәмәгать эшлеклесе Сәид Таһир улы Диаров. Аларга өлкә ифтарында диния нәзарәте, «Сембер» бизнес-клубы һәм «Өмет» газетасы редакциясенең дипломнары белән кыйммәтле бүләкләре тапшырылды.