Мәскәүдәге Табиблар клубының ике вәкиле Россия Фәннәр академиясе академигы булды
Июнь башында Россия Фәннәр академиясе әгъзаларының гомуми җыелышында фәнни учреждениенең яңа академиклары исемлеге расланды. Бу хакта Татарстанның Россиядәге Тулы вәкаләтле вәкиллеге матбугат хезмәте хәбәр итә.
Россия Фәннәр академиясенең медицина фәннәре бүлеге исемлегенә Татарстанның Россиядәге Тулы вәкаләтле вәкиллеге каршындагы Табиблар клубының ике вәкиле керде.
Алар – «Россия Фәннәр академиясенең М.П.Чумаков исемендәге иммунобиологик препаратлар әзерләү һәм тикшеренүләр федераль фәнни үзәге» федераль дәүләт бюджет фәнни учреждениесе (Полиомиелит институты) генераль директоры, медицина фәннәре докторы, профессор Айдар Ишмөхәммәтов һәм С.М.Киров исемендәге Хәрби-медицина академиясе башлыгы, медицина фәннәре докторы, профессор Евгений Крюков.
Айдар Ишмөхәммәтов улы шулай ук И.М.Сеченов исемендәге Беренче Мәскәү дәүләт медицина университетының иммунобиологик препаратлар җитештерүне оештыру һәм технологияләр кафедрасы мөдире һәм табиблар өчен чыга торган «Медицинский совет» журналының баш мөхәррире дә.
Айдар Ишмөхәммәтов Уфада танылган физиолог, Башкортстан Республикасы Фәннәр академиясенең мактаулы академигы, профессор Айрат Ишмөхәммәтов гаиләсендә туган.
Евгений Крюков – Россия Федерациясе һәм Татарстан Республикасының атказанган табибы. 2014-2020 елларда ул академик Н.Н.Бурденко исемендәге Баш хәрби клиник госпиталь башлыгы булган.
Аның ярдәмендә госпитальдә ел саен «Бурденко очрашулары» Бөтенроссия конференциясе үткәрелә, анда Татарстан табиблары да актив катнаша. Евгений Владимирович Табиблар клубы составында берничә тапкыр Татарстанга килде, республика хастаханәләре һәм клиникаларында табиблар белән очрашты. Медицина хезмәте генерал-майоры Евгений Крюков Севастопольдә туган.