Миңнеханов Петербург форумында РФ Дәүләт Советының Торак комиссиясе киңәшмәсен үткәрә
ТР Президенты Рөстәм Миңнеханов киләсе атнада Петербург халыкара икътисади форумына бара, анда Татарстан стенды тәкъдим ителәчәк. Ул форум кысаларында берничә очрашу үткәрергә, шулай ук Россия Дәүләт Советының үзе җитәкли торган Төзелеш, торак-коммуналь хуҗалык һәм шәһәр мохите комиссиясе киңәшмәсендә катнашырга ниятли. ТР Президентының матбугат хезмәте җитәкчесе Лилия Галимова брифингта журналистларга шулай дип белдерде.
Ул хәзерге вакытта республика делегациясенең форумдагы төгәл эш программасы әзерләнүен билгеләп үтте.
«Сөйләшүләр һәм очрашулар үткәрү буенча илнең зур компанияләре һәм субъектлары ягыннан кызыксыну һәрвакыттагыча көчле. Моннан тыш, Рөстәм Нургалиевич РФ Дәүләт Советының Торак комиссиясен җитәкли, әлеге юнәлеш буенча җентекле киңәшмә үткәрү күздә тотыла. Шулай ук Россиянең башка субъектлары җитәкчеләре белән очрашулар каралган, берничә килешүгә кул кую планы да бар», - диде Лилия Галимова.
ТР Президентының матбугат хезмәте җитәкчесе форумдагы Татарстан стендында республиканың икътисади потенциалы тәкъдим ителәчәген әйтте. Аның мәйданчыгында шулай ук берничә очрашу оештырылачак.