Алабуга тукталышларында видеокамералар куячаклар
Алабуга тукталышларында видеокамералар куячаклар. Бу хакта «Алабуга нуры» газетасы хәбәр итә.
Әлегә видеокамералар алты тукталышка куела. Алабуга МРУЭС башлыгы Айдар Фатыйхов хәбәр иткәнчә, проект төзелгән, бу җәйдә урнаштырачаклар. Мондый чаралар вандализмны бетерергә ярдәм итәчәк.
Мәсәлән, Галиәсгар Камал урамындагы тукталыш павильоны түбәсенең бер өлеше һәм ян стеналары юк, тукталыш тирәсендә чүп-чар ята, чөнки чүп савытлары куелмаган. Билгеле, яңгыр һәм җилдән мондый корылма сакламаячак. Без башкарма комитетыннан тукталыш павильоннарының торышы өчен җавап бирүчене белештек һәм кайчан яңартылачагын сорап мөрәҗәгать иттек.
АМР Башкарма комитетының инфраструктура үсеше бүлеге җитәкчесе Илназ Миңнебаев аңлатып узганча, Галиәсгар Камал урамындагы тукталыш павильоны 1 сентябрьгә кадәр яңасына алыштырылырга тиеш. Тагын бер ватылган павильон Болгар урамында урнашкан. Аның түбәсе һәм эскәмиясе ватылган. Аны киләсе елга алыштырырга ниятлиләр, диелә хәбәрдә.