Рөстәм Миңнеханов Бәһрәйн илчесе белән хезмәттәшлек юллары хакында фикер алышты
Татарстан Президенты Рөстәм Миңнеханов Петербург халыкара икътисади форумында Бәһрәйн Корольлегенең Россиядәге илчесе Әхмәд Абдулрахман Әл-Саати белән очрашты һәм аның белән хезмәттәшлек юллары хакында фикер алышты. Бу хакта «Татар-информ» агентлыгына ТР Президентының матбугат хезмәте җитәкчесе Лилия Галимова хәбәр итте.
Татарстан Президенты Россия-Бәһрәйн мөнәсәбәтләре кысаларында Татарстан белән хезмәттәшлек итүгә игътибар күрсәткәне өчен илчегә рәхмәт белдерде.
«Бәһрәйннең ислам эшләре буенча Югары Советы Рәисе, шәех Абдулла бин Мөхәммәд бин Рәшид Әл-Хәлифәнең Татарстанга күптән түгел ясаган визиты ике арадагы дусларча элемтәләрнең дәлиле булып тора», - диде Миңнеханов, кунакны сәламләп. Рәис быелның май аенда Идел буе Болгар дәүләтендә ислам динен кабул итүнең 1100 еллыгын бәйрәм итү уңаеннан оештырылган чараларда катнашты.
«Сезнең илегез бездә узган чараларда югары дәрәҗәдә тәкъдим ителгәне өчен Бәһрәйн Короле галиҗәнап Хәмәд бин Иса Әл-Хәлифәгә рәхмәт сүзләрен җиткерүегезне сорыйм», - дип мөрәҗәгать итте Рөстәм Миңнеханов илчегә.
Президент Татарстанның Бәһрәйн белән дусларча элемтәләрне югары бәяләвен һәм аларны киңәйтергә омтылуын билгеләп үтте.
Рөстәм Миңнеханов искәрткәнчә, «Татнефть» компаниясе дә Бәһрәйн белән хезмәттәшлеккә карата кызыксыну белдерә һәм аның вәкилләре кооперация перспективалары хакында фикер алышу өчен Манамага барырга әзер.