Красногорск шәһәрендә өлкә Сабан туе була
18 июньдә Мәскәү өлкәсенең Красногорск шәһәрендә 20нче Мәскәү өлкә Сабан туе – халыклар дуслыгы бәйрәме узачак. Бу хакта Татарстанның Россиядәге тулы вәкаләтле вәкиллеге матбугат хезмәте хәбәр итә.
Бәйрәм шәһәрнең Мәдәният һәм ял паркында узачак.
Татарстаннан Сабан туена район башлыгы Аяз Шәфигуллин җитәкчелегендәге Ютазы муниципаль районы делегациясенең килүе көтелә. Ютазы районы бәйрәмдә татар утары оештырачак.
Чарада Мәскәү өлкәсенең җирле татар оешмалары җитәкчеләре һәм вәкилләре катнаша.
Бәйрәмнең программасында (ул 10.30 сәгатьтә башланып 18.00 сәгатькә кадәр дәвам итәчәк) билбау көрәше турниры, халык уеннары, ике сәхнәдә зур концерт программасы каралган. Сабан туенда сувенирлар сатып алырга, милли ризыклардан авыз итәргә мөмкин.
2023 елда өлкә Сабан туен үткәрү эстафетасын Дубна шәһәре кабул итә. Анда милли бәйрәм беренче тапкыр 2007 елда узган иде.
Красногорск Сабан туен Мәскәү өлкәсе Хөкүмәте һәм ТР Вәкаләтле вәкиллеге ярдәмендә Красногорск шәһәр округы хакимияте, Мәскәү өлкәсе төбәк татар милли-мәдәни автономиясе һәм җирле татар милли-мәдәни автономиясе оештыра.