Иваново Сабан туенда билбау көрәше ярышы булачак
18 июньдә 12.00 сәгатьтә Иваново шәһәренең Степанов исемендәге паркында татар халкының милли бәйрәме – Сабан туе узачак. Быел ул Идел буе Болгар дәүләтендә ислам динен кабул итүнең 1100 еллыгына багышлап үткәрелә. Бу хакта Бөтендөнья татар конгрессының матбугат хезмәте хәбәр итә.
Чараның программасында бәйрәм концерты, күңел ачу программасы, билбау көрәше һәм фотозона каралган. Концертта Иваново һәм татар иҗат коллективлары чыгыш ясаячак. Шулай ук милли ризыклардан авыз итәргә мөмкин. Бәйрәмгә Татарстаннан кунаклар килүе дә көтелә.
Сабан туе төбәк территориясендә 1994 елдан бирле үткәрелә. Ул язгы чәчү эшләре тәмамланганнан соң уздырыла. Сабан туенда төрле бәйгеләр һәм ярышлар (ат чабышы, йөгерү, билбау көрәше һ.б.) оештырыла, диелә хәбәрдә.