Миңнеханов Петербург икътисади форумында Үзбәкстан инновацион үсеш министры белән очрашты
Татарстан Президенты Рөстәм Миңнеханов Петербург халыкара икътисади форумында Үзбәкстанның инновацион үсеш министры Иброхим Абдурахмонов белән очрашты һәм аның белән ике республика арасындагы хезмәттәшлек юллары хакында фикер алышты. Бу хакта «Татар-информ» агентлыгына ТР Президентының матбугат хезмәте җитәкчесе Лилия Галимова хәбәр итте.
«Бездә динамика яхшы. Сезнең милли лидер, Президент Шәүкәт Миромон улы Мирзияев безнең эшлекле мөнәсәбәтләргә бик актив ярдәм күрсәтә», - диде Миңнеханов Үзбәкстан делегациясен сәламләп.
Президент «Чирчик» индустриаль паркының уңышлы үсеш кичерүен аерым билгеләп үтте. Әлеге парк Россия компанияләре производстволарын урнаштыру өчен Ташкент өлкәсендә ачылган.
«Игътибарыгыз һәм ярдәмегез өчен рәхмәт. Без хезмәттәшлеккә һәрвакыт әзер. Бүген пленар утырышта фән һәм технологияләр алдында торган зур сынаулар турында чыгыш ясаячакмын. Без Татарстан белән бу юнәлештә дә хезмәттәшлек итәбез», - диде министр.