Миңнеханов Петербург форумында Казахстан Президенты белән хезмәттәшлек турында сөйләште
Татарстан Президенты Рөстәм Миңнеханов Санкт-Петербургка (ул анда халыкара икътисади форумда катнашу өчен барды) эш сәфәре кысаларында Казахстан Президенты Касыйм-Жомарт Токаев белән очрашты. Бу хакта «Татар-информ» агентлыгына Татарстан Президентының матбугат хезмәте җитәкчесе Лилия Галимова хәбәр итте.
Рөстәм Миңнеханов Касыйм-Жомарт Токаевны Казахстан Конституциясенә үзгәрешләр һәм өстәмәләр кертү мәсьәләсе буенча референдумның уңышлы узуы белән котлады һәм ил өчен әлеге тарихи вакыйганың әһәмиятен билгеләп үтте.
«Бүгенге көндә Казахстан – Татарстанның әйдәп баручы чит ил партнерларыннан берсе. Безнең мәсьәләләргә игътибар күрсәткәнегез һәм уртак проектларны гамәлгә ашыруга һәрвакыт әзер торганыгыз өчен сезгә бик тә рәхмәтлебез», - дип искәртте Рөстәм Миңнеханов.
Узган ел Татарстан белән Казахстан арасындагы товар әйләнеше 629 миллион доллар тәшкил иткән. Яклар әлеге күрсәткечләрне арттыру һәм хезмәттәшлекне, шулай ук сатыла торган товарларның номенклатурасын киңәйтүнең әһәмиятенә игътибар юнәлтте. Быел Россия Федерациясе һәм Казахстан Республикасы арасында дипломатик мөнәсәбәтләр урнашуның 30 еллыгы билгеләп үтәчәген дә искә алдылар.
«Татарстанга күптән түгел ясаган визитымны зур канәгатьләнү хисе белән искә алам, эшлекле активлык күзлегеннән ул бик бай булды», - дип искәртте Казахстан Президенты. Шул ук вакытта, ул уртак проектларның гамәлгә ашырылуын игътибар белән күзәтүен һәм аларны шәхси контролендә тотуын әйтте.
Очрашу барышында «Татнефть» ГАҖ генераль директоры Наил Маганов һәм «КАМАЗ» ГАҖ генераль директоры Сергей Когогин Касыйм-Жомарт Токаевка Казахстан территориясендә үз проектларын гамәлгә ашыруның барышы хакында сөйләде.
Очрашу ахырында «Татнефть» ГАҖ һәм «КазМунайГаз» компаниясе арасында Казахстанның Атырау өлкәсендәге Каратон-Саркамыс геологик-разведка проектын гамәлгә ашыру нияте турында килешү имзаланды.
Каратон-Саркамыс җир асты байлыклары участогы Атырау өлкәсендә Тенгиз, Королевское ятмалары һәм «Эмбамунайгаз» АҖ ятмалары төркеме белән янәшә урнашкан. 2022 елның февралендә Каратон-Саркамыс «КазМунайГаз» НК АҖ җир асты байлыкларыннан файдалану хокукын бирү өчен углеводородлар эзләү һәм чыгару максатыннан җир асты байлыклары кишәрлекләре территорияләре исемлегенә кертелде.
XXV Петербург халыкара икътисади форумы Санкт-Петербургта 15-18 июньдә уза.