Рөстәм Миңнеханов Аurus автомобильләре чыгаруны дәвам итәргә вәгъдә бирде
Аurus комплектлау җиһазлары белән тәэмин итүдә кыенлыкларга карамастан, автомобильләр чыгаруны дәвам итәчәк.
«Бөтен җирдә проблемалар бар. Һәм һәркайда без <...> хәл итү юлларын табабыз. Aurus чыгарылачак», - диде бүген ТАССка Татарстан Президенты Рөстәм Миңнеханов Петербург халыкара икътисади форумында.
Aurus - 2013 елдан РФ Сәнәгать һәм сәүдә министрлыгы заказы буенча төзелә торган автомобильләр линейкасы. Аның башлангыч ноктасы дәүләт башлыгы өчен илдә җитештерелгән лимузинга ихтыяҗ булу иде.
2013 елның көзендә РФ Президенты Владимир Путин Бердәм модуль платформа базасында люкс класслы автомобильләр төзү һәм җитештерү проектын эшләү турындагы боерыкка имза куйды. Хәзерге вакытта Aurus дәүләт башлыгының рәсми транспорт чарасы булып тора.
Узган елның маеннан башлап Аurus автомобильләре Алабуга заводында серияле җитештерелә.