Башкортстанда гидроциклга беркетелгән өреп кабартыла торган диван катерга килеп бәрелгән
Якынча мәгълүматлар буенча, әлеге хәл бүген көндезге унберләр тирәсендә Башкортстанның Мәләвез районы Нугуш сусаклагычында булган.
«Спартаковец» балалар лагере территориясендә суда гидроциклга беркетелгән өреп кабартыла торган диванда йөрү хезмәте тәкъдим ителгән. Әйтик, шуларның берсендә гидроцикл белән идарә итүче бауның озынлыгын исәпкә алмаган һәм кешеләр утырган диван янәшәдән узып баручы катерга килеп бәрелгән.
Нәтиҗәдә, бер кеше үлгән, тагын берсе төрле тән җәрәхәтләре алган – аны җирле район хастаханәсенә озатканнар. Хәзер әлеге хәлнең нечкәлекләрен ачыклыйлар.
Урынга тикшерүчеләр һәм Стәрлетамак транспорт прокуроры урынбасары юл тоткан. Вазгыять Идел буе транспорт прокуратурасы контролендә, дип хәбәр иттеләр ведомствоның матбугат хезмәтендә.