Казан кинофестивале волонтерларны проектта катнашырга чакыра
XVIII Казан халыкара мөселман киносы фестивале волонтерлар командасын туплау турында игълан итә. Кандидатларга куелган төп таләпләр - ул инициативалы булу, җаваплылык һәм кино сәнгатенә мәхәббәт. Командага 18 яшьтән өлкәнрәкләр чакырыла.
«Һәр кандидат белән әңгәмә үткәреләчәк, анда без фестивальдә эшләү өчен аларның көчле якларын һәм өстенлекләрен ачыклаячакбыз. Ел саен волонтерлар командасы 30 кешедән тора, һәм, тәҗрибә күрсәткәнчә, киноиндустрия эчендә кайнарга теләүчеләр аз түгел», — дип сөйләде волонтерлар хезмәте кураторы Александра Латышева.
Ул һәр волонтер уникаль эш тәҗрибәсе алачак һәм аңарда якты тәэсирләр калачак, диде. Хәер, иң мөһиме-ул фестиваль эшен эчке яктан күрә ала.
Халыкара мәдәни проектның бер өлеше булу өчен 22 августка кадәр анкета тутырырга һәм «Волонтер» тамгасы белән аны business@kazan-mfmk.com адресы буенча җибәрергә кирәк. Анкетада исем, фамилия, әтиегезнең исеме, туган ел, яшәү урыны, шулай ук элемтә өчен телефон һәм электрон почта адресы күрсәтелергә тиеш. Моннан тыш, гаризада уку яки эш урыны турында мәгълүмат, белгечлек, фестиваль вакытында курс яки биләгән вазифа, инглиз һәм башка чит телләрне белү дәрәҗәсе, мондый вакыйгаларда эшләү тәҗрибәсе турында мәгълүмат булу мөһим.
Оештыручылар шулай ук проект барышында кандидат теләгәнә дә колак салалар.
Казан халыкара мөселман киносы фестивале 7-11 сентябрьдә Татарстан Республикасы Президенты Рөстәм Миңнеханов ярдәмендә һәм «Россия — Ислам дөньясы» стратегик караш төркеме белән партнерлыкта узачак.