«Отряд Таганок» һәм «Сестренка» фильмнары илнең башка төбәкләрендә дә күрсәтелә башлаган
Башкортстан кинематографистларының «Отряд Таганок», «Сестренка» һәм башка берничә фильмнары илнең башка төбәкләрендә кинотеатрларда прокатка чыкты. Башкортстан башлыгы Радий Хәбиров социаль челтәрләрдә шул хакта хәбәр итте. «Башинформ» шул турыда яза.
Республика җитәкчесе билгеләп үткәнчә, әлеге фильмнар фестивальләрдә, шул исәптән халыкара фестивальләрдә бүләкләргә лаек булган. Моннан тыш, алар Башкортстанның тарихын, гореф-гадәтләрен, туган телен саклап калуга ярдәм итә һәм үсеп килүче буынны тәрбиялиләр.
«Без Башкортстанда төшерелгән фильмнарны бөтен кеше дә карый алсын өчен тырышабыз. Моның өчен республикада кинозаллар яңартыла. Федераль ярдәм белән шәһәр һәм авылларда 47 кинозал яңадан җиһазландырылды», – дип язган Радий Хәбиров.
Башкортстан башлыгы хәзерге вакытта республиканың 9 районында кинозаллар булмавын белдерә. Республика авыл кешеләре өчен кинозалар булдыру эше дәвам итәчәк, ә әлегә әлеге муниципалитетларга киномобильләр йөри.