Саратов өлкәсендә хатын-кызлар өчен Коръән уку курслары узды
Александров Гай авылы Җәмигъ мәчетендә хатын-кызлар өчен Коръән уку буенча кыска вакытлы курслар тәмамлана. Россия Мөфтиләр шурасы шул турыда хәбәр итте.
Аны Саратов өлкәсе мөселманнарының Диния нәзарәте каршындагы «Зейд бин Сабит» Коръән үзәге Серекбай хәзрәт Ирканалиев җитәкчелегендәге Алгай мөхтәсибәте белән берлектә уздыра.
Коръәннең төп нөсхәсен уку буенча дәресләр июль башында башланды. Аларны «Зейд бин Сабит» үзәге укытучысы Фәридә остазбикә Баксаисова алып бара.
Атнага өч тапкыр кичке вакытта уза торган дәресләрдә курс тыңлаучылары гарәп алфавитын өйрәнә һәм «Нур кагыйдәләре» буенча тәҗвид кагыйдәләре белән таныша.
«Төркемдә 18 кеше – алар арасында балалар, урта яшьтәге мөселман хатын-кызлары һәм пенсионерлар бар. Төркем ике өлешкә бүленгән. Беренче төркемгә Коръәнне яңа өйрәнә башлаучылар керә. Икенчесендә – Аллаһ китабын төп нөсхәдә укый белгән кешеләр. Алар белән без Коръән укыйбыз һәм тәҗвидны төзәтәбез», – дип билгеләп үтте Фәридә остазбикә Баксаисова.
Курсларны тыңлаучылар дәресләрне калдырмаска тырыша, дип сөйләде ул. «Аларның бу дәресләрне ничек көтүләре күренә. Алар дәресләрдән максималь файда алырга тырыша», – дип өстәде «Зейд бин Сабит» Коръән үзәге укытучысы.
Хатын-кызлар өчен Коръән буенча кыска вакытлы курслар 2022 елның 28 июлендә тәмамлана.
«Зейд бин Сабит» Коръән үзәгендә кыска вакытлы курсларның Александров Гай авылында, шулай ук Саратов өлкәсенең башка районнарында да даими рәвештә үткәрергә җыенуларын белдерделәр.