Италиядә туган Элио Фиорини Яшел Үзәннең баш архитекторы итеп билгеләнде
Италиянең Терни шәһәрендә туган Элио Фиорини бу атнада Яшел Үзәннең баш архитекторы итеп билгеләнде. Яшел Үзән районының матбугат хезмәте җитәкчесе Регина Чибрикова «Татар-информ» агентлыгына шул хакта хәбәр итте.
Яшел Үзәннең баш архитекторы вазифасына гаризалар кабул итү 12 апрельдә башланды. Бәйгенең җиңүчесе үз проектын шәһәр территориясендә гамәлгә ашыра алачак. Баш архитекторның уй-ниятләре арасында яңа ЗАГС, Мәдәни үсеш үзәге территориясе, Бокс үзәге, китапханә, мәктәпләр, шәһәр урамнары һәм тулаем алганда Яшел Үзәнне үстерү планы бар.
Элио Фиорини Казан кызына өйләнгәннән соң Россиягә килгән. Берникадәр вакыт Италия һәм Азәрбайҗанда яшәгәннәр, анда архитектор ул чагында Баку шәһәрен үстерү белән шөгыльләнгән, Татарстанда еш булганнар. Нәтиҗәдә, балалары биредә мәктәптә укый һәм алга таба шушында белем алсын өчен республика башкаласына күченергә карар кылганнар.
Элио Фиорини - Италия Архитекторлар советы әгъзасы. Ул Терни шәһәрендәге Архитекторлар советы һәм Италия Архитекторлар палатасына керә, үз Ватанында, Согуд Гарәбстанында, Берләшкән Гарәп Әмирлекләрендә һәм Азәрбайҗанда эшләгән.