Түбән Камада триатлон буенча беренчелек һәм чемпионат була
6 августта Кызыл Чишмә бистәсе яры буенда триатлон буенча беренчелек һәм чемпионат, «Балалар лигасы» республика ярышларының V этабы узачак.
Уеннарны Татарстан Триатлон федерациясе һәм шәһәр администрациясе оештыра. Бүгенге көндә Түбән Кама, Казан, Әлмәт, Уфа, Ижевск һәм Мәскәү шәһәрләреннән 130 катнашучы теркәлгән. Катнашу бәясе - 500 сум. Бу хакта Түбән Кама муниципаль районы рәсми сайтында хәбәр ителә.
Спортчылар өч этапта ярышачаклар: йөзү, велоузыш һәм йөгерү. Унсигез яшьтән олы ир-атларга һәм хатын-кызларга ярышта 750 метр суда йөзәргә, 20 км велосипедта узышырга һәм 5 км йөгерергә туры киләчәк.
13-17 яшьлек егетләр һәм кызлар арасында дистанцияләр түбәндәгечә булачак: йөзү - 300 м., велосипедта узышу - 8 км һәм йөгерү - 2км.
12 яшьтән кечерәк катнашучылар өчен «акватлон» планлаштырылган – 200 метр йөзү һәм 1 км кросс.
Теркәлү 5 августка кадәр, сылтама буенча теркәлергә мөмкин. Приз фонды - 210 мең сум. Моннан тыш, җиңүчеләр, призерлар медаль һәм диплом белән бүләкләнәчәк.
Игътибар итегез, ярышлар уздырылуга бәйле рәвештә транспорт чаралары хәрәкәте чикләнәчәк. 9: 00 сәгатьтән 15:00 сәгатькә кадәр «Пятерочка» кибетеннән яр буена таба понтон күпер һәм дамбага кадәр юл ябылачак. Кунаклар өчен автомобильләр кую урыны - «Мирас» мәдәният йорты тукталышы.