Алабугада «Созвездие-Йолдызлык» мәдәни үсеш үзәге август аенда куллануга тапшырылачак
Алабугада «Созвездие-Йолдызлык» мәдәни үсеш үзәге август аенда куллануга тапшырылачак. Барлыгы быел 27 корылма төзекләндереләчәк. Шәһәр һәм район объектларында төзү-төзекләндерү эшләре бара.
Бүгенге көндә 6нчы микрорайондагы «Чемпион» физкультура-сәламәтләндерү комплексында ремонт ясыйлар. Бина 1979 елда салынган. Былтыр андагы бассейнны тулысынча төзекләндерделәр. Быел нефтьчеләр ярдәме белән спорт комплексының түбәсен, электр белән тәэмин ителешен һәм фасадын ремонтлаячаклар. Район җитәкчелеге эшне 1 сентябрьгә төгәлләү бурычын куйган. Бу хакта «Алабуга нуры» сайтында хәбәр ителә.
«Татнефть» гранты һәм җирле бюджет хисабына Университет бакчасы яңарды. Биредә тренажерлар да куярга, нарат, алмагач, миләш утыртырга уйлыйлар. Әйтергә кирәк, шәһәрнең аскы өлешендә мондый ял урыны юк иде әле. Университет мәктәбе янындагы скверны уңайлы итүне район башлыгы Рөстәм Нуриев тәкъдим итте. Өч елда аны бөтенләй үзгәртергә ниятлиләр.
Алабуга муниципаль районы башкарма комитеты каршындагы Төзелеш департаменты директоры Равил Шәрипов әйтүенчә, августта берьюлы берничә корылма тапшырылачак. Мисал өчен, федераль программа буенча төзелгән «Созвездие-Йолдызлык» мәдәни үсеш үзәге. Ул 2021 елда төзелә башлаган иде. Август ахырында шулай ук Тугаров урамындагы футбол кыры да тапшырылачак.
Уку елы башлану алдыннан мәктәп биналары да яңартыла. Мисалга, 8нче мәктәптә ремонт эшләре бара инде. Шәһәр-районның 5 мәктәбендә — 1, 2, 3, 10 һәм Лекарево мәктәбендә туклану бүлекләре төзекләндереләчәк. Балалар хастаханәсендә шулай ук ремонт ясала.
«Татнефть» грантына Вакыйф Саркаров исемендәге уку театры да ия булган. Биредә капиталь ремонт кысаларында фасад, түбә, тәрәзәләр һәм сәхнә эшләнәчәк.
Тулырак: http://alabuganury.ru/news/h%D3%99b%D3%99rl%D3%99r/alabugany-chempion-sport-kompleksynda-remont-bara