Мәһдиев Севастопольдә «Набережные Челны» катерында Хәрби-диңгез флоты көне белән котлады
Чаллы мэры Наил Мәһдиев Хәрби-диңгез флоты көнендә Севастопольгә килде. Ул үз сәхифәсенә язылучыларны сәламләде һәм Telegram-каналында «Набережные Челны» ракета катерында хезмәт итүче якташларын тәбрик итте.
«Хәзерге вакытта «Набережные Челны» ракета катерында хезмәт итүче егетләрнең барысы да сезгә зур сәлам тапшыра. Без шәһәребезнең исеме Кара диңгез флотында яңгыравы һәм «Набережные Челны» катеры экипажының сугышчан бурычын лаеклы рәвештә үтәве белән горурланабыз», - дип язган ул.
Шәһәр башлыгы шулай ук 2018 елның гыйнварында Кара диңгез флоты ракета катерларының берсенә «Набережные Челны» дигән исем бирелүен искәртте.
Хәрби-диңгез көне илебездә июльнең соңгы якшәмбесендә СССР Югары Советы Президиумының 1980 елның 1 октябрендәге «Бәйрәм һәм истәлекле көннәр турында»гы указы нигезендә билгеләп үтелә. Ул россиялеләрнең иң яраткан бәйрәмнәреннән берсе, аны тагын Нептун көне дип тә атыйлар.