Әгерҗе мәктәпләрендә 50 ел эшләгән укытучы Сания Вахрушеваның яңа китабы дөнья күрде
Әгерҗе мәктәпләрендә 50 ел укытучы булып эшләгән хезмәт ветераны, «Халык мәгарифе отличнигы» Сания Вахрушеваның «Туган ягым белән горурланам» дигән яңа икенче китабы дөнья күрде.
Әгерҗегә дан җырлаучы иҗат әһеленең дүрт бүлектән торган бу китабында туган җир, районнан чыккан Советлар Союзы геройлары турында һәм мәктәпкә, укытучыларга, игелекле эшмәкәрләргә, спортка багышланган 86 җыр тупланган. Аларның яртысы рус, яртысы татар телендә иҗат ителгән. Сания Вахрушева җырларның сүзләрен дә, музыкасын да үзе яза. Бу хакта «Әгерҗе хәбәрләре» сайтында хәбәр ителә.
Беренчесе 2013 елда «Чәчәк атып, гөрләп яшә, туган җирем!» исеме белән дөнья күргән иде. Китап көз көне тәкъдим ителәчәк.