Лавров Миңнехановка «Халыкара хезмәттәшлеккә керткән өлеше өчен» күкрәк билгесен тапшырды
Бүген Россия Тышкы эшләр министрлыгы башлыгы Сергей Лавров Татарстан Республикасы Президенты Рөстәм Миңнехановка ведомство бүләген – Тышкы эшләр министрлыгының «Халыкара хезмәттәшлеккә керткән өлеше өчен» күкрәк билгесен тапшырды. Бу бүләк ике яклы хезмәттәшлекне үстерү, рус телен һәм мәдәниятен популярлаштыру, ватандашларга ярдәм итү буенча проектлар һәм башка казанышлар өчен Россия Тышкы эшләр министрлыгы белән актив уртак хезмәт өчен бирелә. Очрашуда шулай ук «ВЭБ.РФ» дәүләт Үсеш Корпорациясе рәисе Игорь Шувалов катнашты.
Рөстәм Миңнеханов белән очрашуда Лавров билгеләп үткәнчә, республика җитәкчесе илләр арасындагы элемтәләрне ныгыту өчен күп эш башкара һәм Россиянең тышкы сәяси активлыгына өлеш кертә. Барыннан да элек, ведомство башлыгы фикеренчә, бу «Россия – ислам дөньясы» стратегик караш төркеме эшчәнлегенә кагыла, аны Татарстан Президенты җитәкли.
«Халыкара аренадагы кыенлыкларга карамастан, Стратегик караш төркеменең ничек эшләвендә Рөстәм Миңнехановның өлеше зур», – дип ассызыклады РФ Тышкы эшләр министры.
Шуннан соң очрашуда катнашучылар уртак проектларны гамәлгә ашыру һәм Татарстанның халыкара партнерлар белән хезмәттәшлектә роле турында фикер алышты. Моннан тыш, алар ислам дөньясы илләре белән үзара файдалы мөнәсәбәтләрне ныгыту темалары турында да сөйләште, дип хәбәр итә Татарстан Президентының матбугат хезмәте.
Искәртеп үтәбез, бүген Татарстан Республикасы Президенты Рөстәм Миңнеханов эш сәфәре белән Мәскәүдә. Сәфәрнең төп максаты – Россия башкаласында татар шагыйре Габдулла Тукай һәйкәленә чәчәкләр салу белән башланган Татарстан мәдәнияте көннәрендә катнашу.