Әлмәт балалар йортында чыгарылыш кичәсе булды
Ел саен август азагында Әлмәтнең балалар йортында чыгарылыш кичәсе уза, анда балалар туган йорты белән хушлаша һәм олы мөстәкыйль тормышка атлый. Тәрбияләнүчеләр тормышындагы әлеге борылыш ноктасы тәрбиячеләрнең, шәһәр хакимиятенең һәм кичә кунакларының шатлыгы һәм җылы теләкләре белән билгеләп үтелде.
Район башлыгы Тимур Нагуманов исеменнән Әлмәт районы башкарма комитеты җитәкчесе Айдар Каюмов Әлмәт балалар йортында узган тантанада катнашты. Быел Әлмәт балалар йортын олы тормышка 4 бала атлый: Рузил Вәлиев, Рөстәм Насыйбуллин, Андрей Ситало һәм Рәүф Сударев. Бу турыда «Әлмәт таңнары» сайтында хәбәр ителә.
Барлык чыгарылыш сыйныф укучылары да имтиханнарны уңышлы тапшырып, аттестатлар алды һәм урта һөнәри уку йортларына керде. Район башкарма комитеты җитәкчесе балалар йорты тәрбиячеләренә, хезмәткәрләренә балалар өчен бик мөһим булган хезмәтләре өчен рәхмәт белдерде.
Ул Елена Ефимованы «Мәгарифтәге казанышлары өчен» күкрәк билгесе белән бүләкләде. Мәгариф системасын үстерүгә зур өлеш керткәне һәм күпьеллык намуслы хезмәте өчен Лилия Арикуловага ТР Мәгариф һәм фән министрлыгының Мактау грамотасы тапшырылды.