Апасның «Садә» ансамбле үзешчән халык коллективы исеменә лаек булды
Казанда 14нче «Түгәрәк уен» Бөтенроссия фольклор фестивалендә Апас районының өлкәннәре дә катнашып, җиңү яулады. Әлеге этночарада Земфира Мөхәммәтшина җитәкчелегендәге «Садә» ансамбле 3нче дәрәҗә дипломант булды. Бу турыда «Йолдыз» сайтында хәбәр ителә.
«Ә иң зур шатлыгыбыз - ансамблебезгә Халык исеме бирелде. Әлеге чарада беренче җиңүебез генә түгел. «Түгәрәк уен»да катнашып, күп мәртәбәләр лауреат исемен яулап килдек. «Садә» фольклор ансамблебезнең 44 еллык тарихы бар. Заманында районның күренекле шәхесе Илдар Сәйфетдинов оештырып җибәргән ансамбльнең эзсез югалмавы һәм халык исеменә лаек булуы белән чиксез горурланабыз», - ди Земфира Мөхәммәтшина.