Фәрит Мөхәммәтшин Чаллыда мегамәктәп ачты
Чаллыда, яңа уку елының беренче көнендә яңа заманча мәктәп – «Белем бирү үзәге 62» ачылды. Автокаладагы иң зур мәктәпне ачу тантанасында ТР Дәүләт Советы Рәисе Фәрит Мөхәммәтшин катнашты.
Тантананы ачып, Чаллы мэры Наил Мәһдиев Чаллы халкына шундый бүләк ясаганнары өчен республика җитәкчелегенә рәхмәт әйтте һәм илкүләм проектларны гамәлгә ашыруның нәтиҗәлелеген билгеләп үтте.
Республика җитәкчелеге исеменнән укучыларны котлап, Фәрит Мөхәммәтшин Татарстанда белем бирү өлкәсен яңарту өчен күп нәрсә эшләнүен искәртте.
«Мондый мәктәпнең ачылуы Чаллының ышанычлы рәвештә үсүе хакында сөйли. Шәһәрнең потенциалы гаять зур, ул республиканың социаль-икътисади үсешенә зур өлеш кертә. Биредә балалар һәм яшьләр өчен бөтен шартлар да бар. Илкүләм проектларны гамәлгә ашыру нәтиҗәсендә Татарстан белем бирү инфраструктурасын сизелерлек ныгытты. Соңгы 11 елда, шул исәптән 2022 елда республикада 79 мәктәп һәм 284 балалар бакчасы төзелде.
Мәктәптә укучыларны тукландыру мәсьәләләренә аерым игътибар бирелә – 97,6 процент бала кайнар аш белән тәэмин ителгән. Татарстанда Цифрлаштыру елында мәгълүмати-технологик яктан тәэмин итүгә игътибар көчәйде. Республиканың барлык мәктәпләре дә югары тизлекле интернетка тоташтырылган, предмет кабинетларының 80 проценты интерактив һәм проекцион техника белән җиһазландырылган», - диде парламент башлыгы.
Дәүләт Советы Рәисе сүзләренчә, бүген Татарстандагы 1,4 мең мәктәптә 490 меңнән артык укучы парта артына утырачак. 55,2 мең бала мәктәп бусагасын беренче тапкыр атлап керәчәк.
«Күркәм гадәткә буенча, быел беренче сыйныфка керүче 7 мең балага, шулай ук аз тәэмин ителгән гаиләләрдәге 34 меңгә якын 2-11 сыйныф укучысына мәктәпкә җыенырга ярдәм иттек. Тәрбия мәктәп эшчәнлегенең бер өстенлеге булырга тиеш. Балаларда туган шәһәренә, республика һәм илгә карата ватанпәрвәрлек хисләре тәрбияләргә кирәк. Бу мәсьәләдә мәктәп лаеклы эшләр дип өметләнәм», - диде Мөхәммәтшин.
Парламент җитәкчесе Татарстанда милли белем бирүне үстерүне уңышлы башлангыч дип атады.
«Россия халыкларының Мәдәни мирасы елында әлеге мәсьәлә аеруча актуаль. Татарстанда 173 милләт вәкиле дус-тату гомер итә. Татарстан халыклары Ассамблеясы Советы рәисе буларак, безнең якшәмбе мәктәпләрен билгеләп үтәсем килә. Аларда 22 бүлектә 19 милләт балалары телләр һәм мәдәниятне өйрәнә. Татарстанның беренче Президенты Минтимер Шәймиев инициативасы белән «Адымнар» күп телле белем бирү комплексларын төзү дәвам итә. Мондый мәктәпләр Казан, Алабуга, Түбән Кама, Әлмәт, Актанышта һәм сезнең шәһәрдә сафка басты инде», - дип искәртте Мөхәммәтшин.
Мәктәп укучыларын яңа уку елы башлану белән котлап, парламент башлыгы аларның әти-әниләре һәм укытучылары, туган шәһәрләре һәм республикаларының горурлыгы булачагына ышаныч белдерде.
Аннары Фәрит Мөхәммәтшин Белем бирү үзәген сафка бастыруда зур тырышлык куйган төзүчеләргә ТР Дәүләт Советы Рәисенең Рәхмәт хатларын тапшырды.