Диас Сафин «Идея» технопаркының яңа генераль директоры булды
Диас Сафин Казанның «Идея» технопаркына җитәкче итеп билгеләнде. Аны Татарстанның Инвестицион-венчур фонды директоры, технопаркның директорлар советы рәисе Айнур Әйделдинов тәкъдим итте. Бу хакта фондның матбугат хезмәте хәбәр итә.
Билгеләп үтелгәнчә, Диас Сафин моңа кадәр Идел буе федераль округындагы Dahua Technology RUS вәкиллеген җитәкләгән, шулай ук «Софт-Троник» ҖЧҖ генераль директоры урынбасары булып эшләгән. Сафин «Идея» генераль директоры вазифасында Олег Ибраһимовны алыштырды.
«Технопарк җитәкчелеге алдына һәрвакыт гадәти булмаган бурычлар куелды, алар оператив рәвештә үтәлде. «Идея»дә 15 елдан артык эшләгән Олег Евгеньевич технопаркның уңышына шәхси өлеш кертте», - дип белдерде Айнур Әйделдинов.
Шунысын да искәртик: технопарк 2004 елның 5 февраленнән эшли. Анда 84 компания урнаштырылган, аларда 2,6 меңнән артык кеше хезмәт куя.