Апаста язучы Зифа Кадыйрова белән очрашу узды
Апас район үзәк китапханәсендә китап укучылар, аграр көллият студентлары язучы Зифа Кадыйрова белән очрашты. Бу хакта «Апас»-информ» газетасы яза.
Әлеге очрашу «Апас, Тәтеш, Буа - мәдәни дуга» халыкара сәнгать фестивале кысаларында үтте.
Китап укучылар үзенчәлекле әсәрләрдәге геройлар, язмышлар хакында сөйләштеләр. Авторның «Язмыш сынавы», «Бәхеткә юл кайда?», «Сагынырсың - мин булмам», «Көтеп узган гомер», «Синсез килгән язлар» һәм башка әсәрләре турында фикер алыштылар.
«Мин 48 яшемдә яза башладым. Геройларым халык арасыннан чыккан кешеләр. Әсәрләр тәрбияви һәм гыйбрәтле», – диде язучы.
Очрашуда район башкарма комитеты җитәкчесе урынбасары Гөлүсә Галләмова катнашты һәм Зифа Кадыйровага район башлыгының Рәхмәт хатын тапшырды, чәчкәләр бүләк итте. Үзенең иң яраткан язучысы булуын билгеләп үтте һәм рәхмәтен ирештерде, диелә хәбәрдә.