Арча районында Ат көне узачак
17 сентябрь көнне Арча районы Яңа Кырлай авылында ТР Президенты Рөстәм Миңнеханов катнашында традицион бәйрәм - Ат көне узачак.
Бу хакта Татарстанның Авыл хуҗалыгы һәм азык-төлек министрлыгының матбугат хезмәте хәбәр итә.
Республикада беренче тапкыр 160 км дистанциягә узышлар буенча Россия Кубогын уздыру планлаштырылган, ул ТР Спорт министрлыгы һәм РФ Ат спорты федерациясенең бердәм календарь планына кертелгән.
Ат чабышларында Карачай-Черкессия, Кабардин-Балкария, Төмән, Пенза, Липецк, Оренбург, Мәскәү яны өлкәләре, Самара, Саратов, Мәскәү һәм Санкт-Петербургтан спортчылар катнашырга теләк белдергән.
Ат-спорт фестивале кысаларында ат чабышлары, атлар катнашында милли бәйгеләр, 120, 100, 80 һәм 40 км дистанцияга ярышлар буенча эре халыкара ярышларның берсе - "Халыкара БДБ Кубогы" узачак.
Чара кысаларында җирле токым атлары чабышлары һәм атларда көрәш буенча "Аударыш" бәйгесе планлаштырылган. Ике километрга кадәр кыскарак дистанцияләрдә "Авыл егетләре" чабышларында татар токымлы атлар узышачак.