Мишустин Россиядә яңа һөнәри бәйрәмне гамәлгә куярга кушты
15 сентябрьдә Россиядә Дәүләт санитария-эпидемиология күзәтчелеге көнен билгеләп үтәчәкләр. Россия Премьер-министры Михаил Мишустин Россия Кулланучы хокукларын яклау һәм кеше иминлеге өлкәсендә күзәтчелек федераль хезмәткә (Роспотребнадзор) яңа һөнәри бәйрәмне гамәлгә кую өчен кирәкле документларны әзерләргә кушты.
«Россия Хөкүмәте рәисе Михаил Мишустин аны календарьга кертергә кушты», - диделәр Министрлар Кабинетының матбугат хезмәтендә.
Билгеле булганча, бу көн очраклы гына сайланмаган. Нәкъ менә шул көнне 1922 елда РСФСР Халык комиссарлары советы тарафыннан «Республиканың санитар органнары турында» декрет раслана. Санитар-эпидемиология хезмәтендә эшләүчеләр шуннан бирле бу көнне үз бәйрәмнәре дип саный, әмма ул рәсми төстә Гомумроссия исемлегенә кертелмәгән.