Башкортстанда «Умартачы» форумында тәҗрибә уртаклаштылар
Бүген Башкортстан Республикасы Туймазы районы Төмәнәк авылында «Умартачы» форумы узды. Бу турыда Бөтендөнья татар конгрессының матбугат хезмәте хәбәр итә.
Умартачының җәмгыятьтәге ролен, дәрәҗәсен үстерү,балаларда әлеге һөнәр ияләренә хөрмәт тәрбияләү, шулай ук Россиянең татар авылларында яшәүче татар эшмәкәрләрен җыю, алар белән тәҗрибә уртаклашу, фикер алышу мөмкинлеге тудыру форумның максаты булып тора.
«Умартачы» форумы быел Төмәнәк авылы янында урнашкан «Бабай утары» ачык һавадагы музей этнография комплексында булды.
Биредә умартачылык һәм бал продукциясе күргәзмәсе,Туймазы районының алдынгы умарталыкларына экскурсияләр оештырылды. Шулай ук катнашучылар арасында фикер алышу, тәҗрибә уртаклашу өчен түгәрәк өстәл бар иде.