Кострома татарларының тарихы турында күргәзмә ачылды
Изге Троица Ипатьевский ир-атлар монастырендә Кострома татарлары тарихы турында «Бер җеп белән бәйләнгәннәр» дигән уникаль күргәзмә ачылды. Чара Россия мөселманнары Диния нәзарәтенең мәдәният департаменты тарафыннан Изге Троица Ипатьевский ир-атлар монастыреның чиркәү музееның баш сакчысы Виноградова Наталья Геннадьевна белән берлектә оештырылды. Бу хакта Россия Мөфтиләр шурасының матбугат хезмәте хәбәр итә.
Тантаналы чарада Россия Мөфтиләр шурасы рәисенең беренче урынбасары, РФ мөселманнары Диния нәзарәте рәисе урынбасары Рушан Аббясов, Монастырь наместнигы игумен Петр, Татарстан Премьер-министры урынбасары, Бөтендөнья татар конгрессы Милли Шурасы рәисе Васил Шәйхразиев, Кострома өлкәсе мөселманнары Диния нәзарәте рәисе Ришат Сәйдәшев, мәдәни-агарту һәм иҗтимагый оешмалар вәкилләре, Кострома халкы катнашты.
Мөфти Шәех Равил Гайнетдин фатихасы белән ачылган күргәзмә Идел буе Болгары халыклары тарафыннан Ислам кабул ителүнең 1100 еллыгына багышланган. Ул Костроманың аерым өлеше - Идел буенда өч гасырдан артык булган Татар бистәсе, анда рус һәм татарларның тату яшәүләре һәм хезмәт куюлары тарихы турында сөйли.
«Бер җеп белән бәйләнгәннәр» күргәзмәсе агымдагы елның 6 ноябренә кадәр дәвам итәчәк.