Татарстанда дүрт кеше имгәнгән аварияне машина урлап алып киткән кеше китереп чыгарган
Татарстанның Югары Ослан районында кичәге юл-транспорт һәлакәте турында күбрәк мәгълүмат билгеле булды. Бу турыда Татарстан прокурорының өлкән ярдәмчесе Руслан Галиев хәбәр итте.
Якынча мәгълүматлар буенча, Коллар авылы кешесе машина йөртү таныклыгы булмаган һәм исерек килеш «Лада» автомобилен урлап алып киткән һәм Казан ягына хәрәкәт иткән. Юлда ул машина белән идарә итә алмаган һәм каршы як полосага чыгып, Toyota автомобиленә бәрелгән. Юл-транспорт һәлакәтеннән соң, бу ир-ат качкан.
Татарстан прокуратурасы мәгълүматлары буенча, Toyota автомобилендә Киров өлкәсеннән туйга баручы гаилә булган. Юл-транспорт һәлакәтендә дүрт кеше – Toyota машинасында йөртүче 38 яшьлек хатын-кыз, 62 яшьлек пассажир һәм 6 яшьлек кыз, шулай ук «Лада» машинасындагы 25 яшьлек ир-ат җитди имгәнгән.
Юл-транспорт һәлакәте урынына прокурор Василий Егоров килгән. Күзәтчелек ведомствосы бу факт буенча тикшерү үткәрә. Машинаны урлап алып китү очрагы аерым тикшереләчәк.
«Татар-информ» агентлыгы Ульяновск-Казан юлында җитди юл-транспорт һәлакәтендә өч олы кеше һәм бер бала имгәнүе турында хәбәр иткән иде.