Түбән Кама балалар китапханәсе 55 еллык юбилеен билгеләп үтә
Түбән Камада «Апуш» исемендәге Балалар үзәк китапханәсе 55 еллык юбилеен билгеләп үтә. Бу юлы бәйрәмдә укучылар кунак булды. Бәйрәмнең икенче көне хәбәрдән башланды: «Мөһим игъланны тыңлагыз: бүген бездә туган көн! 8 нче һәм 36 нчы мәктәп укучылары китапханәне юбилее белән котлый!». Бу турыда Түбән Кама муниципаль районы рәсми сайтында хәбәр ителә.
«Мин китап тапшырырга килдем һәм бәйрәм башлануын күрдем. Шунда ук калырга да уйладым, чөнки «Апуш»та үткәрелә торган чаралар һәрчак кызыклы үтә, – дип үз тәэсирләре белән уртаклашты Мария Кузнецова. - Мин хәтта мастер-класска да эләктем һәм агач магнитларны буядым».
«Апуш» Балалар үзәк китапханәсе мөдире Гөләмия Сабирова сүзләренчә, мондый чаралар китапханәдә еш уздырыла. Шулай ук бәйрәмнәр «Апуш»ка балаларны җәлеп итәргә дә булыша, чөнки ял һәрвакыт китап белән янәшә барырга тиеш.
Бәйрәм программасыннан тыш, биредә балалар өчен мастер-класслар оештырылды. Кергәндә төрле төстәге медальләр таратылды. Һәр төс билгеле бер залга алып керде. Балалар мастер-классларда фетрдан чәчәк ясады, агач магнитларны буяды, һава шарлары белән «Смешарики» геройларын җыйды.
Истәлеккә һәр балага бүләк бирелде. Балалар китапханәнең туган көнендә «Апуш» курчагы белән уйнады. Габдулла Тукайны балачакта шулай дип атаганнар. «Апуш» курчагы - Тукай урамындагы китапханәгә йөрүчеләрнең иң яраткан персонажы.