Түбән Кама дин әһелләре махсус операциядә катнашучыларга гуманитар ярдәм илтергә китте
Түбән Камадан дин әһелләре махсус операциядә катнашучыларга гуманитар ярдәм илтә. Имамнар махсус операциядә катнашучы сугышчыларга гуманитар йөк китерәчәк. Кичә иртә белән Түбән Кама шәһәреннән «буржуйка»-мич, бензин генераторлары, медикаментлар төялгән «Газель» юлга кузгалды.
Түбән Кама районы имам-мөхтәсибе Салих хәзрәт Ибраһимов әйтүенчә, алгы сафтагы хәрбиләргә ярдәм итү идеясе Түбән Кама дин әһелләрендә дә туды. Акциягә әтиләр, атакайлар, хәзрәтләр һәм имамнар кушылды. Чиркәүләрдә һәм мәчетләрдә иганә җыю өчен тартмалар куелды. Бу хакта Түбән Кама муниципаль районы рәсми сайтында хәбәр ителә.
«Бу безнең өчен беренче тәҗрибә. Әлбәттә, бу сынау. Ике көн барырга кирәк. Минем анда булганым бар. Болар барысы да миңа таныш», - диде Салих хәзрәт.
Хәрбиләрнең хатыннары һәм аналары ирләре өчен тыныч булсын өчен, алгы сызыкка дин әһелләре белән бергә оператор Фәнис абый да барачак.
«Алар тыныч кына барып җитсен өчен, догада булабыз. Догаларыбыз белән аларның кайтуларын да көтәчәкбез. Дин әһелләре махсус операция уза торган чиккә кадәр бара. Анда бару - үзе бер батырлык. Балалар әти-әниләренең, якыннарының, шәһәр халкының кайгыртучанлыгын тойсын өчен, мөмкин кадәр тыныч булсын өчен юлга кузгалабыз. Әлбәттә, биредә калган туганнары һәм якыннары фотоларны күреп, бераз тынычлана алсалар яхшы булыр иде», - ди имам-мөхтәсиб.