Бөтенроссия халык фронтының Татарстандагы җитәкчесе: Миңнехановның абруе шик тудырмый
Бүген төбәк башлыгының яңа атамасы турында Татарстан Дәүләт Советы депутатлары кабул иткән карар гавәми хакимиятнең бердәмлеге принцибын күрсәтә, ә төбәк җитәкчесе Рөстәм Миңнехановның абруе бернинди шик тудырмый. Мондый фикерне Бөтенроссия халык фронтының Татарстан Республикасындагы төбәк башкарма комитеты җитәкчесе Ринат Фазылов җиткерде.
«Хәзерге иҗтимагый-сәяси вазгыятьтә махсус хәрби операция уздыру вакытында гавәми хакимиятнең бердәмлек принцибы бик мөһим һәм актуаль була бара. Татарстан җитәкчелеге моны аңлый», - диде ул.
Спикер билгеләп үткәнчә, республиканың югары вазифаи заты атамасындагы үзгәрешләр Татарстанның бердәм федераль киңлекләрендә яшәвен һәм эшләвен күрсәтә.
«Безнең республика социаль-икътисади күрсәткечләр буенча, һичшиксез, лидер төбәк булып тора. Төбәк җитәкчесе Рөстәм Миңнехановның республиканың иң югары вазифаи заты буларак абруе беркемдә дә шик тудырмый», - дип искәртте Фазылов.
- Бүген Татарстан депутатлары республика җитәкчесенең яңа атамасын хуплаган карарны кабул итте. ТР Конституциясенә Татарстанның югары вазифаи заты атамасын үзгәртүне күздә тоткан төзәтмәләр белән закон проекты беренче укылышта кабул ителде. Иң югары вазифаи зат «Татарстан Республикасы Рәисе» дип аталачак.