Мөхәммәтшин һәм Искаков Татарстан һәм Казахстан арасында хезмәттәшлек хакында сөйләште
Казахстан Татарстанның әйдәп баручы чит партнерларыннан берсе булып тора. ТР Дәүләт Советы Рәисе Фәрит Мөхәммәтшин Казахстанның генераль консулы Ерлан Искаков белән очрашуда шулай дип белдерде.
«Татарстан һәм Казахстан арасында ныклы сәүдә-икътисади һәм гуманитар элемтәләр урнашты. Казахстан Татарстанның әйдәп баручы чит партнерларыннан берсе булып тора. Безнең хезмәттәшлек елдан-ел киңәя», - дип искәртте Мөхәммәтшин.
Шулай да республикалар хезмәттәшлекне тагын киңәйтергә ниятли, моның өчен аның яңа формалар эзлиләр.
Ерлан Искаков, үз чиратында, узып баручы елда Татарстан һәм Казахстан арасындагы хезмәттәшлек нәтиҗәсендә гамәлгә ашырылган мөһим проектларны искә алды. Әйтик, шиннар җитештерү буенча KamaTyresKz уртак предприятиесен булдыру һәм казах драматургы Мохтар Ауэзовның татар телендәге беренче әсәрләр җыентыгын бастырып чыгару – шундыйлардан.
«Соңгы тапкыр – 1981 елда Абайның әсәрләре татар теленә тәрҗемә ителгән булган. Хәзер бөтен татар дөньясы казах драматургының иҗаты белән таныша алачак. Пьесаларны Казан университеты филологлары тәрҗемә иткән», - дип искәртте генераль консул.
Ул Мөхәммәтшинга китапның бер нөсхәсен, шулай ук республикалар арасында дипломатик мөнәсәбәтләр урнашуның 30 еллыгына багышланган истәлекле тәңкә тапшырды.
Искәртеп узабыз, KamaTyresKz Татарстан-Казахстан производствосы быелның 13 декабрендә ачылды. Әлеге тантанада Татарстан Президенты Рөстәм Миңнеханов та катнашты.