Азнакайда депутат Рөстәм Мөхәммәдиев мөмкинлекләре чикле балаларга бүләкләр тапшырды
«Бердәм Россия» партиясенең Азнакай җирле бүлегендә Татарстан Дәүләт Советы депутаты, «Татнефть» җәмгыяте генераль директоры урынбасары Рөстәм Мөхәммәдиев, күркәм традиция буенча, быел да мөмкинлекләре чикле балаларга бүләкләр тапшырды.
Чарага ике һәм аннан күбрәк инвалид бала тәрбияләнүче гаиләләр чакырулы иде. Бу хакта «Маяк» газетасы хәбәр итә.
«Монда барыбызга үрнәк булырдай балалар, гаиләләр җыелган. Бүген мин рәхмәтнең аеруча зурысын әти-әниләргә җиткерәм. Авыруларга карамастан, бирешмичә, сынаулар алдында сыгылмыйча, балаларга бар йөрәк җылыгызны биреп, аларны шундый көчле рухлы итеп тәрбияләвегез өчен рәхмәт», – диде депутат.
Муниципаль район башлыгы Марсель Шәйдуллин азнакайлыларга һәрдаим ярдәме өчен Рөстәм Мөхәммәдиевка тирән рәхмәтен белдерде.
Балалар җитәкчеләрне шигырьләр сөйләп куандырды. Тантанада бирегә чакырылган 22 баланың әти-әнисе дә катнашты. Алар үзләренә, гаиләләренә булган мондый игътибар өчен рәхмәт әйтте.
«Һәрчак безнең хәлебезгә кереп, балаларыбызны зурлаган өчен мең рәхмәт. Сәламәтлектә, бәхеттә яшәргә язсын», – диде барлык әти-әниләр исеменнән Әлфия Шәйдуллина. Ул бүген үз гаиләсенә 15 ятимне сыендырган.