Төркиядә җир тетрәү вакытында Россия кешесе һәлак булган
Россиянең бер гражданы Төркиядә җир тетрәү корбаны булган. Бу хакта «ТАСС» агентлыгына Россия оператив хезмәтләрендә хәбәр иткәннәр.
«Җир тетрәү нәтиҗәсендә Россия Федерациясенең бер гражданины һәлак булуы турында мәгълүмат дипломатик каналлардан килде», – дигән агентлыкның әңгәмәдәше.
Дүшәмбе көнне Төркиянең көньяк-көнчыгышындагы Кахраманмараш провинциясендә җир тетрәде, аның магнитудасы 7,7 булды. Җир асты селкенүләре, алар артыннан 300гә якын җир асты этәргечләре (афтершок) илнең 10 провинциясендә, шулай ук якындагы дәүләтләрдә, шул исәптән Сириядә дә сизелде. Берникадәр вакыттан соң табигый бәла-казаның көчле яңа дулкыны теркәлде. Соңгы мәгълүматларга караганда, Төркиядә 3,3 меңнән артык кеше үлгән, 20 меңнән артык кеше яраланган. Сирия Сәламәтлек саклау министрлыгы мәгълүматлары буенча, табигать бәла-казасыннан 812 кеше һәлак булган, 1,4 меңнән артык кеше зыян күргән.