Түбән Камада яшәүчеләр Лисичанск халкына гуманитар ярдәм җибәрүне дәвам итә
Түбән Камадан Лисичанскига һәм аның тирәсендәге шәһәр, бистә һәм авылларга, шулай ук хәрби бүлекчәгә гуманитар йөк җибәрелде. Бу хакта Түбән Кама муниципаль районы рәсми сайтында хәбәр ителә.
Аның сүзләренчә, битараф булмаган кешеләр медикамент, азык-төлек китерә. Шулай ук эшмәкәрләр дә ярдәм итә. Алар нигездә тәм-том, тәмәке, кием һәм төзелеш кораллары китерә. «Бер гаилә бишек алып килде. Ул бик яхшы хәлдә. Ул Лисичанскида кемгәдер кирәк булыр, дип өметләнәбез», - диде 6, 7 һәм 8 микрорайоннарның территориаль иҗтимагый үзидарә советы рәисе Лариса Орлова.
Моннан тыш, Татарстан Республикасы шефлык иткән шәһәр халкына портатив газ плитәсе, мич-буржуйка, инструмент, инвалидлар өчен коляска җибәрелде.
Бу гуманитар ярдәм Химиклар проспектындагы 72 нче Б йорттагы микрорайонның иҗтимагый үзәгеннән һәм Студентлар урамындагы 9 нчы йорттагы «Бердәм Россия» партиясенең җирле бүлегеннән алынды. Гомуми авырлыгы өч тонна булган йөкне «ГАЗель»гә урнаштырдылар.
«Предприятиеләргә, битараф булмаган түбәнкамалыларга рәхмәт, – диде партиянең җирле бүлекчәсе башкарма секретаре Лариса Михайлова. - Без бергәләп бердәм эш эшлибез».
Искәртик, Түбән Камада гуманитар ярдәм кабул итү өчен 13 мобиль пункт ачылды. Шулай ук добро-н.к.рф волонтерлык хәрәкәтенең рәсми сайты да эшли.