Татарстанның Алексеевск районында велосипедта йөрүче баланы машина бәрдереп үтергән
Алексеевск районы прокуратурасы үлем белән тәмамланган юл-транспорт һәлакәтенә бәйле тикшерү үткәрә, һәлакәттә велосипедчы кечкенә малай үлгән, дип хәбәр итте Татарстан Республикасы прокурорының өлкән ярдәмчесе Руслан Галиев.
Фаҗига бүген көндез Алексеевское бистәсендә 8 Март урамында булган.
Беренче мәгълүматлар буенча, «Шевроле» машинасы йөртүчесе идарәне югалтып, велосипедта баручы малайны бәрдергән. Бала урында ук һәлак булган.
«Татар-информ»га билгеле булганча, малайга 7-8 яшь чамасы.
Вакыйга урынына район прокуроры Фәргать Шәйхаттаров чыккан.
Юл хәрәкәте иминлеге таләпләрен үтәү тикшерелә һәм җинаять эше кузгату мәсьәләсе хәл ителә.