Уфада «Китап бәйрәме» китап ярминкәсен үткәрү көне билгеле булды
26-28 майда Уфада беренче тапкыр «Китап бәйрәме» китап ярминкәсе узачак, ул алга таба ел саен үткәрелә башлар дип көтелә. Бу хакта «Башинформ» агентлыгы хәбәр итә.
Әлеге ярминкәне үткәрү турында Башкортстан Башлыгы Радий Хәбиров III «Арт-Корылтай» Мәдәни форумы барышында әйткән иде. Ярминкәне уздыру тәкъдиме белән Башкортстан Язучылар берлеге чыккан. Хәбиров аны мөмкин кадәр бай эчтәлекле һәм интерактив итәргә кушты.
«Чара Халык хуҗалыгы казанышлары күргәзмәсендәге Мәскәү халыкара китап күргәзмә-ярминкәсе һәм «Кызыл мәйдан» китап фестиваленә охшатып оештырылачак, - дип ачыклык кертте агентлыкка ярминкәне оештыручылар. – «Китап бәйрәме»ндә зур нәшриятлар, китап кибетләре, модель китапханәләр, шулай ук язучылар, рәссамнар, драматурглар һәм сәнгать белгечләре катнашыр дип көтелә. Ярминкә кысаларында яңа китаплар белән сәүдә итүдән тыш, танылган язучылар белән очрашулар оештырылачак, шулай ук яшь авторларның иҗаты белән дә танышырга мөмкин».
«Китап бәйрәме» мәдәният һәм мәгърифәт өлкәсендә диалог, патриотик тәрбия һәм төрле инициативалар киңлеге булачак. Китап ярминкәсе кысаларында дистәләгән бәйге үткәрү күздә тотыла, алар арасында теләгән һәркем күңеленә хуш килгән чараны таба алачак.