Песошин Татарстанда IT-белгечлекләрне популярлаштыру программасы турында боерык имзалады
Татарстанда IT өлкәдәге белгечлекләрнең популярлыгын арттыруга юнәлдерелгән программа расланды. Боерыкны республика Премьер-министры Алексей Песошин имзалады.
«Әлеге программаның предметы – Татарстан Республикасында халык арасында IT-белгечлекләрне популярлаштыруга юнәлдерелгән мәгълүмати кампанияне гамәлгә ашыру», – диелә документта.
Программага берничә пункт кертелгән, шул исәптән 2022-2023 елларда Татарстан югары уку йортларында кабул итү кампаниясен һәм хезмәт базарын анализлау, максатчан аудиториягә мәгълүмат бирү, хакатоннар, чемпионатлар, IT-өлкәдә VR-экскурсияләр үткәрү.
Тупланган мәгълүматларны анализлап, Татарстанда бу юнәлештә кабул итү кампаниясен активлаштыруга һәм 2025 елда кабул итүнең контроль саннарын арттыруга юнәлдерелгән чаралар күреләчәк. Шулай ук максатчан укытуга квотаны арттыру планлаштырыла.
Планны тормышка ашыруга Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы башлыгы Айрат Хәйруллин җаваплы итеп билгеләнде.